Wax dhaaxaan dukaan buuxiyoo beeg u jiifsadaye
Waayana horweyn baala dheer bookh ku foofsadaye
Waayana badoow yaan ahaa beel u yeedhahe
Waayana quraankaan bartoo buuni ku ahaaye
Waayana askari baan u baxay iyo basaas gaale
Boqol iyo hadaan toban gu jirey waa bar kuma taale
Intaasoo barwaaqaa hadii laysku wada biirsho
Bil qudhoon xoriyadii arkaa igala buurayde
Boqor diinta kula haysta ood beeg u garanayso
Oo aadan baqahayn askari inuu ku soo baacsho
Oon beenawaas hadalka cunay kuu bishma cadaynin
Oo aadan boqol hoos u siin baaqina u reebin
Iyana waa bishaaradaan helay ee beyaanka ahe
Berberiyo hargeysaan cadaan baawar ku lahayne
Badaa lagu cashuuraa haday beri yimaadaane
Boqoroowday soomaalidii baadida ahayde
Buugay saxeexaan ma jiro baawar celiyaaye
Nin kastoo is bida maanta waa bera’tamaayaane
Caasimada laysugu bixiyo boosto waa xamare
Waa tay dadkaan biid ogayn baaq ku kiciyeene
Waxaa beesha laysugu camiray say u badataaye
Bahdaana laguma caarido waxaanay baadil ku ahayne
Barayminastarkiyo inamadaan baawarka u dhiibtey
Alaylehe waxaan baahi qabey waa badbadiyeene
Baraarkiyo wankaygii dhashaa boqol la siiyaaye
Waaniga canbaha baayacdiyo barayaroow shaale
Waakaa jidhkaygii bogsaday
Baalidka ahaaye
Boonkii la goo iyo magtii baadilka ahayde
Baadiddii nin qaadaa ma jiro bilo haday taale
Bidixdaa la jarayaa haduu bowlad soo xado’E
Nin baxnaano daran xaajidii waa badh qubataaye
Soomaali biligeedu waa waxay la boodaaye
Hadii baarqab geel lagu daroo buun ku wada goojo
Beryo inanka raacaa haraad baahidii aragye
Bishuu rimay bisheeda han ayuu barada qooyaaye
Inta beertu dhalaysee midhaha kala bislaynayso
Badwi iyo ninkii waalani hayska buuqeene
Balan waxaan ku marayaa haday beri dhow sii joogto
In banaanadaa laga dhergaa baani iyo soore
Oo aan wax baahdaaba jirin balaxsi mooyaane.
Kaydintii Akadimiyadda Afka iyo suugaanta ee Murti
Tafatirkii: Mr: Cumar Ismaaciil Digeed