Gabayga: Dhool
**Adduunyada intii aan dhulmaray dumara aan dheehday
**Hal qof aan ku dhaaf sado maarag dhaban qurxooneey
**Sidii dhool gu oo hooryoo dhibicda miisamey
**Ama dhabarka geenyada shixnadan dheregna aan waayin
**Oo dhoodi Iyo xaysimiyo dharabka hawd joogta
**Ama ubax dhalaal badan sidii dheemankiyo luulka
**Dhaban kaaga curubkaa indhahad dhalaca moodayso
**Suunihad bishii dhalatay Iyo qaanso dhigan moodo
**Dhexda madagta laafyaha dhildhilan dhumucda loo yeelay
**Qoortada dheer jooga aad dhabiga moodayso
**Dhawr soonidiyo aamuskaad gaari dheer tahay
**Dhaqankii horaad raacdoo maadan dheeg marine
**Dhudi hooyadaaba ahayd xeeru dhaladkiiye
**Boqorkii ku dhalay baa tacliin kugu dhigay looxe
**Dhaclihii adaa wali sitiyo boqorkii dhooleey
**Dharaar taynu kulanaa qalbiga leeb la ii dhigaye
**Dhoola ka qosolkaga naftani dheefsata waliye
**Hay dhigin dhabtiyo meel ka dheer dhuuxa iyo laabta
**Ana kuma dhaliiloo Malyuun dhaar ayaan maraye
Abwaan Murtisame gabaygan wuxuu tiriyay 11/06/2014
Kaydintii: Murtiyosuugaan
Tixraac: Abwaan Buureed
Tafatirkii: Mr: Cumar Ismaaciil Digeed