Gabaygii: Shillinkii Xinduugan
Meel Xinduugan la yiraahdo oo haatan ceel laga cabbo ah Gaalkacyana raacsan oo geelal loogu sheegay ayay soo beegsadeen. Degmooyinkii halkaas degganaa kolkii ay ka war heleen inay Daraawiishi dhulka ku jirto ayay geelashii qaxiyeen hase ahaatee adhyowgii bay ka tageen. Colkii markii uu yimid meelihii geela loogu sheegay oo tuludna ka waayeen ayay niyad jabeen. Waxay la kulmeen adhyowgii oo tuban oo qaxid loo diyaarinaayo, markaas bay ciil daraaddiis, kame tegine horta marsadeen !.Gaajadii haysey ayaa ka fuqday kolkii ay qalqasheen wanankii shilista ahaa oo ay haddana caanihii adhiga caloosha ka buuxsadeen.
Ismaaciil isagu ma niyad jabin, geel la’aantana kama xumaan mar haduu adhi helay! Gabay ayuu arrimahaas oo idil ka mariyey oo ahaa:
Shillinkii Xinduugan haddaan shalay jahaad geeyey
Shigta weerar guutadu hadday sheed walba u qaadday
Shaaruflaha Majeerteen hadday shidatay reerkiisa
Haddaan shaaca waaberi u raray shubitinkii ceelka
Shamsadoo nin jooggiyo haddii loo shinshimay awrka
Arlada gaadaanka shaabbaha shaamareer dhigaye
Gebagebada shiilka ah hadday garo ka shawlaysay
Shan-fac-alhu-gub gaalada haddaan sheemo kaga teednay
Shuqulkii mindiilaha haddii shaarrufluhu yaabay
Horweya lagama soo shubo gunaan shucub ka foofeyne
Anoo shiiday baan helay wankii shirixa weynaaye
Shiiliinka ii keen Ilaah waw shukriyayaaye
Nin shahiida baa loo ogaa inuu shaf goostaaye
Nimcadaan shareecada ku helay yaan ka shaabacaye
Shaashlayda ii sudha ratiga shaambin dabadeede!
Murtiyosuugaan
Qalinkii. Mr: Cumar Ismaaciil Digeed