Dal maansheeye.

1. Collaadahan isdaba jooga iyo qiiqa demi waayey
2. Dilka iyo dhibaataday qabto iyo degelka naafoobay
3. Dumar iyo carruurtii ka madhay doobka reeruhuye
4. Duqay iyo wax-garadkii la laa daadahayn jiraye
5. Dillaal iyo Mallaalkii cunay yaa daanyo-qaad u ahe
6. Dadqallada mindida dheer leh unbaa loo durbaan tumaye
7. Ninkii dilayey baa doodayee nabadba yow doonay?

8. Dix-fadhiisigii baa ka degay damalkii waynaa
9. Digadii hulaaqdoon bakhtiyin damal la saarsaar
10. Doqonna kuguma wadin baa intaa lagu dagaayaaye
11. Dulli iyo nin liita unbaa qabiil soo dugaashada’e
12. Dabargooyayaashii ayaa duubka loo xidhaye
13. Daallin iyo Iblays tuug ah yaad daba ordaysaane
14. Dadqallada mindida dheer leh unbaa loo durbaan tumaye
15. Ninkii dilayey baa doonayee nabadba yaw doonay?

16. Kuwa dibadda jooga iyo kuwaa gudaha dooxaaya
17. Labaduba dugaag weeye oo wax isma doorshaan
18. Taar bay dul wada yuururtaa oo war dayday ahe
19. Dawarrada wixii lagu helayna waa wada diraynaa
20. Dayday baa masuul looga dhigay dalawideeniiye
21. Doonyaha belaayada sida baan daadah leenahaye
22. Dadqallada mindida dheer leh unbaa loo durbaan tumaye
23. Ninkii dilayey baa doonayee nabadba yaw doonay?

24. Maskaxda yay dawaar nagu xidheen daabac aan go’ine
25. Dhegahay naga dabooleen indhahay naga dahaadheene
26. Debnihiyo afkay naga xidheen oon diidayba lahayn
27. Sida haan daloosha yuu warkuba naga dusaayaa
28. Dareenkii waxa nagala tegay duul habaar qaba’e
29. Dadqallada mindida dheer leh un baa loo durbaan tumaye
30. Ninkii dilayey baa doonayee nabadba yaw doontay?

31. Siday diintu tidhi, ruux wax dilay daahir noqon waaye
32. Rabbina muunan dedin oo sharciga diirka ka caddeeye
33. Doofaar ku taabta iyo isagu wax isma doorshaane
34. Dadqallada mindida dheer leh un baa loo durbaan tumaye
35. Ninkii dilayey baa doonayee nabadba yaw doonay?

36. Dammiin aan wax qorin jaahil aan downa garanayn
37. Dirri aan wax gelin oon aqoon deris walaalaynta
38. Oon soo duweyna barran inuu didiyo mooyaane
39. Nin isdoortay kelidii intuu duur cidla ah aaday
40. Dadqallada mindida dheer leh un baa loo durbaan tumaye
41. Ninkii dilayey baa doonayee nabadba yaw doonay?

42. War dorraad buu Kobruhu kugu hanqadhay danabka tuuraa
43. Dan bayna naga lahaayeen inay soo degaan Xamar
44. Dembina mayna gelin culimadaa gaalku deydeyi
45. Dadka go’aya waa baarcaddii uu dalku lahaa
46. Dhiiggaynu wada daawannaa soo darroorimaye
47. Dadqallada mindida dheer leh un baa loo durbaan tumaye
48. Ninkii dilayey baa doonayee nabadba yaw doonay?

49. War hay diidin Soomaaliyey waan idiin digiye
50. Waxaan dooni een rabo ayaan diirka ka caddayne
51. Qoys waliba intuu kii dilay mayada deeqsiiyo
52. Derbi adag quraanjo leh intaan diilinta u saarno
53. Garbaduub intaynu u xidhniyo xarig aan sii daynin
54. Xakame aan damayn oon baxayn dalaq ku soo siino
55. Oo derisku ay wada hadlaan daaqsintiyo foofka
56. Danwadaagtu qaadaadhigaan hadal an daalaynin
57. Ha la doono Soomaali-Wayn ul iyo diirkeed ah
58. Ama daadsanow qaaradaha lagugu dooxaayo

Kaydintii: Akademiyadda Afka iyo Suugaanta ee Murti

Qalinkii & Tafatirkii: Mr: Cumar Ismaaciil Digeed